Hjá okkur ertu í öruggum höndum!

Veigamikill þáttur í þeim öryggislausnum sem stærri fyrirtæki eða stofnanir byggja oft á er að viðkomandi aðilar hafi vel þjálfaða staðbundna öryggisverði í þjónustu sinni. Hlutverk þeirra er að sjá til þess að reglum varðandi umgengni og frágang sé fylgt og að áherslum í samþykktri öryggisstefnu viðkomandi fyrirtækis eða stofnunar sé einnig almennt fylgt eftir. Fyrirkomulagi og framkvæmd staðbundinnar öryggisgæslu má annars í stuttu máli lýsa þannig: Staðbundinn öryggisvörður sinnir skilgreindum verkefnum og almennu fyrirbyggjandi eftirliti á staðnum, hefur umsjón með öryggiskerfum og bregst við ef eitthvað ber út af í öryggislegu tilliti.

Hlutverki öryggisvarða er jafnan lýst í ítarlegri handbók öryggisvarða, sem samin er í samráði við þjónustukaupa fyrir hvert verkefni. Handbókinni er ætlað að ramma inn starf og hlutverk öryggisvarða á staðnum, auk þess sem í handbókinni er að finna nauðsynlegar upplýsingar fyrir öryggisverði þannig að þeir geti sinnt hlutverki sínu.

Eðli málsins samkvæmt eru öryggisverðir í staðbundinni gæslu alfarið staðsettir á gæslustað þjónustukaupa, sem getur verið eitt eða fleiri aðliggjandi hús eða athafnasvæði. Gæsluverkefnið er skilgreint nánar í þjónustusamningi sem gerður er á milli aðila um verkefnið. Í mörgum tilvikum byggir þjónustukaupi á staðbundinni öryggisgæslu allan sólarhringinn. Þá vinna öryggisverðir á vöktum og geta haft ólíkum verkefnum að gegna, eftir því hvort um dag- eða næturtíma er að ræða, virkan dag eða helgi.

Öryggisverðir í staðbundinni gæslu hafa jafnan hlotið víðtæka þjálfun. Þjálfuninni er haldið við með reglulegri upprifjun, æfingum og framhaldsþjálfun eftir því sem við á. Námskeiðin taka mið af því að þjálfa öryggisverði í því að stunda markvisst fyrirbyggjandi eftirlit, þekkja virkni öryggiskerfa og almenns rekstrarbúnaðar og að öðlast þekkingu í því hvernig þeir skuli bregðast við ef eitthvað ber út af í öryggislegu tilliti. Þá þurfa öryggisverðir fyrirtækisins að sækja viðurkennd námskeið í skyndihjálp, námskeið í meðferð handslökkvibúnaðar og hvernig þeir geti tryggt eigið öryggi sem best, svo eitthvað sé nefnt.

Hlutverk öryggisvarða í staðbundnum verkefnum er jafnan að tryggja almennt öryggi á staðnum, sjá um símsvörun, móttöku og aðgangsstýringu eða viðhalda lokun á aðgengi utan daglegs vinnutíma auk þess að vera eftirlitsaðili með hvers konar öryggisþáttum á staðnum.

Starf staðbundinna öryggisvarða er oft nokkuð fjölþætt. Þeir gegna afar mismunandi hlutverki í þeim verkefnum sem fyrirtækið tekur að sér. Hlutverkið getur verið allt frá því að sinna símsvörun og móttöku starfsmanna og gesta í fyrirtækið til þess að sinna beinu öryggiseftirliti frá miðlægri aðstöðu öryggisvarða, svokölluðu Security Center. Í slíkri aðstöðu er endabúnaður öryggiskerfa staðsettur, skjáir öryggismyndavélakerfa auk ýmiss konar eftirlitsbúnaðar fyrir hvers konar rekstrarbúnað viðkomandi fyrirtækis eða stofnunar. Öryggismálum á staðnum er jafnan stjórnað úr aðstöðunni og þaðan eru viðbrögð ákveðin þegar eitthvað fer úrskeiðis eða neyðarástand skapast.
Þá er almennt byggt á því fyrirkomulagi að öryggisverðir í staðbundinni gæslu fara í reglubundnar eftirlitsferðir um gæsluverkefnið skv. þeim fyrirmælum sem fram koma í handbók öryggisvarða. Með eftirlitsferðunum á að tryggja að frágangur og almennt ástand sé í samræmi við verklagsreglur og áherslur þjónustukaupa. Viðkoma öryggisvarða í eftirlitsferðum er staðfest með rafrænni skráningu.

Stjórnstöð Securitas hefur eftirlit með öryggi og viðveru öryggisvarða í staðbundnum verkefnum. Öflugt fjarskiptakerfi og neyðarkerfi, TETRA, tryggir örugg samskipti og tengingu öryggisvarða í staðbundnum verkefnum við traust bakland Securitas, svo sem við stjórnstöð og fjölmarga öryggisverði í farandgæslu sem eru stöðugt á ferðinni um allt höfuðborgarsvæðið.
Innra gæðaeftirlit Securitas tekur út verklag og framkvæmd á starfi öryggisvarða. Það aðhald tryggir að farið sé eftir verklagsreglum Securitas og áherslum og að þjónustan sé almennt í samræmi við væntingar þjónustukaupa.

Securitas hefur verið leiðandi í verðmætaflutningum á Íslandi í tæpa þrjá áratugi. Reynsla og fagmennska skiptir miklu máli þegar kemur að þjónustu eins og verðmætaflutningum. Þessi þjónustuþáttur hefur vaxið umtalsvert á liðnum árum, ekki síst vegna aukinnar kröfu um meira öryggi í flutningi fjármuna á milli staða og aukinna verðmæta í umferð. Securitas hefur mætt aukinni þörf á verðmætaflutningum með fagmennsku og heilsteyptum þjónustulausnum sem hafa meðal annars verið teknar út af erlendum fagaðilum á þessu sviði. Framkvæmdin í þeim úttektum hefur almennt hlotið mikið lof.

Í verðmætaflutningum starfa vel þjálfaðir öryggisverðir með bakgrunn úr öryggisgæslu og annarri neyðarþjónustu. Flestir öryggisverðir sem sinna þessari þjónustu hafi því unnið um árabil hjá fyrirtækinu áður en þeir teljast gjaldgengir í verðmætaflutninga fyrirtækisins. Þeir eru valdir úr stórum hópi umsækjenda í hvert sinn sem staða í verðmætaflutningadeild fyrirtækisins er auglýst, en hjá fyrirtækinu starfa um 230 öryggisverðir. Þeir öryggisverðir sem svo eru valdir til starfa í deildinni eru sérstaklega þjálfaðir skv. erlendri fyrirmynd og þurfa að standast ýmsar kröfur varðandi bakgrunn, reynslu og líkamlegt atgervi.

Öryggisverðir í verðmætaflutningum eru búnir öflugum varnarbúnaði og vinna samkvæmt ítarlega skilgreindu verklagi, þar sem agi og formfesta eru lykiláherslur. Verðmæti í flutningi eru varin með besta fáanlega búnaði, auk þess sem flutningsaðilar eru undir stöðugri rafrænni ferilvöktun stjórnstöðvar. Securitas býður ábyrgð á þeim verðmætum sem flutt eru á meðan þau eru í flutningi og í vörslu starfsmanna fyrirtækisins.

Stjórnstöð Securitas stjórnar viðbrögðum við öll frávik frá þeim verkferlum sem unnið er eftir. Öflugt fjarskiptakerfi og neyðarkerfi, TETRA, tryggir hámarksöryggi í samskiptum.

Valkostir í verðmætaflutningum:
DAGLEGIR FLUTNINGAR
Hentar þeim sem eru með mikla daglega veltu. Sérþjálfaðir öryggisverðir taka við þeirri fyrirhöfn og áhættu sem fylgir því að fara með uppgjör fyrirtækis í banka.
AFRITUN OG VARSLA GAGNA
Á liðnum árum hefur færst í vöxt að fyrirtæki vilji eiga afritunarspólur úr rekstri fyrirtækisins á öruggum stað utan fyrirtækisins. Securitas hefur því boðið þá þjónustu að sækja afritunarspólur úr tölvukerfi fyrirtækja til varðveislu utan fyrirtækisins. Ráðstafanir sem þessar koma í veg fyrir að upplýsingar úr tölvukerfi fyrirtækisins glatist við hugsanlegan bruna, innbrot eða skemmdarverk, vatnsleka eða aðra vá.
SÉRVERKEFNI
Securitas tekur að sér fjölmörg sértæk verkefni í verðmætaflutningum í tengslum við sérstaka álagstíma, s.s. fyrir jól, útsölur, sýningar, tónleikahald og fleira.
ÁFYLLING Á HRAÐBANKA
Securitas hefur um árabil séð um áfyllingar á hraðbanka fyrir banka og fjármálastofnanir utan höfuðstöðva þeirra. Securitas býður öruggan og fumlausan flutning á verðmætum þar sem skýrum og öguðum verkferlum er fylgt auk þess sem flutningurinn er fjarvaktaður. 

Öryggisráðgjafar Securitas veita frekari upplýsingar í síma 580 7000 og þeir aðstoða við að finna lausnir sem henta hverjum og einum.

Þegar Securitas var stofnað 1979, byggði starfsemin eingöngu á hefðbundinni farandgæslu. Segja má að farandgæslan hafi skapað grunn að öðrum þjónustuþáttum fyrirtækisins auk þess að vera grunnurinn að því viðbragðsafli sem fyrirtækið byggir á vegna boða frá öryggiskerfum sem eru tengd stjórnstöð fyrirtækisins.

Fyrirtækið er með tugi öryggisvarða í farandgæslu á Höfuðborgarsvæðinu. Þeir sinna eftirlitsverkefnum í öryggisgæslu allan sólarhringinn, alla daga ársins fyrir fjölda fyrirtækja og stofnana.

Farandgæsla felur í sér að öryggisvörður hefur í sinni umsjá, tiltekinn fjölda fyrirtækja og stofnana innan ákveðins borgarhluta sem telst til hans vaktsvæðis. Verklag og starfsaðferðir farandgæslu taka mið af þjónustusamningi auk þess sem þjónustan er framkvæmd í samráði við áherslur þjónustukaupa, til að tryggja að væntingar séu í samræmi við framkvæmdina. Ítarleg verklýsing er samin fyrir hvert verkefni í farandgæslu, en verklýsingar eru unnar í náinni samvinnu við þjónustukaupa.

Öryggisverðir farandgæslu hafa hlotið víðtæka þjálfun, m.a. vegna umgengni við hvers konar öryggiskerfi og áherslna sem byggt er á vegna fyrirbyggjandi eftirlits við mismunandi aðstæður, auk þjálfunar í skyndihjálp, meðferð handslökkvibúnaðar og viðbrögðum við hvers konar frávikum í öryggislegu tilliti. Þjálfun öryggisvarða byggir auk þess bæði á símenntun varðandi þau öryggiskerfi sem fyrirtækið selur og þjónustar auk framhaldsnámskeiða sem er ætlað að auka hæfni öryggisvarða til að sinna starfi sínu á faglegan hátt og tryggja sem best eigið öryggi í starfi.

Starf öryggisvarða í farandgæslu er fjölþætt. Farandgæslan byggir á að farnar eru eftirlitsferðir um fyrirtækið, utan sem innan, og með því farið yfir að allur frágangur sé í lagi. Þegar öryggisvörður fer inn í fyrirtæki er það hlutverk hans að yfirfara að frágangur sé í samræmi við verklagsreglur og óskir verkkaupa. Má þar nefna sem dæmi; frágangur véla og rafmagnstækja sé í lagi, frágangur á hurðum og opnanlegum gluggafögum sé góður, skrúfað sé fyrir rennandi vatn og að annar frágangur sé í samræmi við áherslur og óskir þjónustukaupa.

Algengt er að öryggisverðir farandgæslu sjái um að fara ítarlega eftirlitsferð í fyrirtækjum í lok dags, þannig að tryggt sé að frágangur sé í lagi fyrir nóttina og áður en öryggiskerfi eru varðsett. Þetta eru eftirlitsferðir sem koma sér einkar vel í fyrirtækjum þar sem óljóst er hver ber ábyrgð á frágangi í lok dags.

Sérþekking og þjálfun öryggisvarða Securitas varðandi aðstæður og áhættur í öryggislegu tilliti tiltekins viðskiptavinar standa að baki gluggamerkinga Securitas um að fyrirtæki sé „vaktað“.

Eitt af meginhlutverkum öryggisvarða í farandgæslu er að sinna útköllum vegna boða frá öryggiskerfum. Stjórnstöð Securitas hefur yfirsýn yfir fjölda öryggisvarða farandgæslu og staðsetningu þeirra hverju sinni með aðstoð ferilvöktunarbúnaðar. Með þeirri yfirsýn er stjórnstöð í lófa lagið að stýra öryggisvörðum í útköll vegna boða frá öryggiskerfum eða ef aðstoðar er þörf. Öflugt fjarskiptakerfi og neyðarkerfi, TETRA, tryggir hámarksöryggi í samskiptum.

Innra gæðaeftirlit Securitas fer yfir alla þætti í starfi öryggisvarða. Það aðhald tryggir að farið sé eftir verklagsreglum og að þjónustan sé í samræmi við væntingar þjónustukaupa.

Þarfir viðskiptavina geta verið afar ólíkar en í sumum tilvikum er um tímabundnar þarfir að ræða. Securitas sérhæfir sig í að skilgreina lausnir sem geta verið blanda af mannaðri gæslu og tæknilausnum en þær eru umfram allt byggðar á þörfum og áherslum þjónustukaupa hverju sinni og taka mið af því að tryggja öryggishagsmuni hans.

Algengt er að viðskiptavinir fyrirtækisins þurfi á aðstoð við öryggisgæslu að halda tímabundið vegna sérstakra aðstæðna. Oftast er um tímabundið verkefni að ræða sem Securitas getur tekið að sér með stuttum fyrirvara. Þarfir viðskiptavina eru sérstaklega skilgreindar og gerður er þjónustusamningur um verkefnið. Hann tekur mið af skilgreindum þörfum, áherslum og tímamörkum vegna verkefnisins. Sérverkefni af þessu tagi eru því þjál lausn fyrir þjónustukaupa til þess að mæta tímabundnum þörfum hans um aukið öryggi og sérsniðna lausn með hliðsjón af því.

Sem dæmi um sérverkefni má nefna staðbundna öryggisgæslu í skilgreindan tíma, dyravörslu og almenna gæslu á tónleikum, íþróttakappleikjum og stærri viðburðum af ýmsu tagi. Sérverkefnalausnir, sem taka mið af mönnuðu eftirliti af þessu tagi, eru einkar hentugar lausnir þar sem erfitt er að koma tæknilausnum við.